Iratzarrik bere konpromiso ekologista berretsi nahi du justizia klimatikoaren alde eginez. Gazte erakundearen ustez aldaketa klimatikoaren erruduna sistema kapitalista bera da, kontsumo eta kutsadura neurrigabekoa bultzatzen duena.

Horregatik Aralarreko gazteak presente izango gara datozen asteotan egingo diren mobilizazioetan, ekologikoa eta iraunkorra den  benetako eredu bat aldarrikatuz planeta osorako.

Iratzarri gazte erakundeak beste herrietako gazte mugimenduekin harremanak sendotzen jarraitzen du. Herri ezberdinetako aldarrikapenak zein dinamikak jasotzea eta, aldi berean, Euskal Herrian Iratzarri egiten ari den borroka zabaltzea du helburu nazioarteko lan honek.

Ildo honi jarraituz, Aralarreko gazte erreferentea presente egongo da Galiza Novak antolaturiko "Noita da irmandade"-n (Ourense), eta JERC eta BNGko gazte erakundearekin batera "Organizando a mocidade, loitando pola patria" izeneko mahai inguruan parte hartuko du.

Iratarri gazte erakundearen 2009ko Asanblada Orokorra Donostian izango da abenduaren 19an, larunbatean, Aralarreko egoitzan. Bertan Hego Euskal Herriko gazteek aurten Iratzarrik egindako lanaren inguruan hausnartu eta eztabaidatuko dute eta datorren urteari begira proposamenak egin eta erabakiak hartuko dituzte.

Iratzarri 2004an sortu zenetik, gero eta gazte gehiago parte hartzen ari dira Aralarreko gazte erreferentearen barruan. 2010an gazte talde independentista eta ezkertiarrak ospatuko duen bere II. Biltzarrari begira, Iratzarriren Asanblada Orokorrak arlo politikoari zein antolakuntzari ekingo die.

Emakumeokiko Indarkeriaren Aurkako Nazioarteko Eguna dela eta, hainbat ekimen burutuko dira Euskal Herri osoan azaroaren 25ean. Maiz zigorrik gabe geratzen den bortizkeria matxistarekin bukatzeko, Iratzarri gazte erakundeak ezinbestekotzat jotzen du alde batetik erantzun zuzena, eta bestetik indarkeria mota honi aurre egiteko baliabide guztiak martxan jartzea.

Esparru guztietan emakume izateagatik pairatzen ditugun diskriminazio eta desberdintasun egoeren ondorioa baita emakumeen kontrako genozidioa.

Joventuts de ERC-k (JERC) antolaturiko XXII. Biltzarrean presente egon zen Iratzarriren ordezkaritza bat. Herrialde Katalanetako gazte erakunde independentista antolakuntza arloan zein maila politikoan erreferentea dela baieztatu du berriro ere Iratzarrik. Zentzu honetan, Iratzarrik JERC zoriontzen du egindako lanagatik.

Erakunde biak etorkizunean elkarlanean jarraitzeko asmoa erakutsi dute, gazteon arazoei ezkerreko ikuspegi independentista batetik erantzun ahal izateko.

Faxismoaren aurkako nazioarteko eguna dela eta,  azaroaren 9an Bilbon burutuko den mobilizazioan parte hartzeko deia zabaldu dio Iratzarrik euskal gazteriari. "Kristal apurtuen gaua" ez ahazteko eta azken urteotan Euskal Herrian sufritzen ari garen eraso faxistak salatzeko asmoz, Iratzarrik bat egiten du Sare Antifaxistak eta EHGAM-ek deituriko elkarretaratze honekin.

Berriro ere Aralarreko gazte erreferenteak bere konpromiso antifaxista berretsi nahi du eta datozen urteetan lan egingo du mobilizazio hauek Euskal Herri osoan zehar burutu daitezen. Kontzentrazioa azaroaren 9an, astelehenean, 19:30etan izango da Arriaga antzokiaren aurrean (Bilbon).

Iratzarriko militante talde bat bildu da Eusko Legebiltzarraren aurrean ekintza sinboliko bat egiteko: Herrizaingo den Sailburu Rodolfo Aresen dimisioa eskatzea bere argazkiak kenduz.

Iratzarrik aipatu duenez "pertsona guztien oinarrizko eskubideak errespetatzen ez dituen pertsona bat ezin da Eusko Jaurlaritzako Sailburu izan" eta honen ondorioz bere "berehaleko dimisioa" eskatu du gazte erakundeak.